FRIÐRIK SKÚLASON EHF

Opnunartímar: Virka daga frá 9:00 til 16:00
Sími: 561-7273

Sala og dreifing: sala@puki.is
Upplýsingar og aðstoð: sala@puki.is

Íslendingabók: islendingabok@islendingabok.is

Friðrik Skúlason ehf er á Facebook !

Heimilisfang:
Suðurlandsbraut 4 a
108 Reykjavík

Kennitala: 510693-2489
VSK númer: 38262

FYRIRTÆKIÐ

Friðrik Skúlason ehf. var stofnað árið 1993 og starfar á sviði hugbúnaðar og rannsókna. Fyrirtækið byggir á traustum grunni og var með þeim fyrstu á landinu sem hófu sölu á vöru sinni og þjónustu í gegnum netið með hjálp tölvupósts.

Markmið fyrirtækisins hefur frá upphafi verið að bjóða upp á gæðahugbúnað og framúrskarandi þjónustu.

Friðrik Skúlason þróaði ritvilluvörnina Púka út frá lokaverkefni sínu úr tölvunarfræði í Háskóla Íslands ásamt Steinþóri Bjarnasyni. Púki hefur gagnast mörgum notendum við yfirferð íslensks máls og er enn jafn vinsæll og áður.

Friðrik Skúlason ehf. hefur einnig staðið að útgáfu ættfræðiforritsins Espólíns, en ástæðu fyrir gerð forritsins má rekja til mikils áhuga Friðriks á ættfræði Íslendinga. Espólín forritið þróaðist síðar í samvinnu við Íslenska erfðagreiningu yfir í Íslendingabók sem er öllum Íslendingum aðgengileg í gegnum netið.

VERÐLAUN OG VIÐURKENNINGAR

Upplýsingatækniverðlaun
Friðrik Skúlason hlaut Upplýsingatækniverðlaun Skýrslutæknifélags Íslands árið 2010 fyrir framúrskarandi framlag til upplýsingatækni á Íslandi. Mikilvægi upplýsingatækni hefur aukist gríðarlega á undanförnum árum og samfara því hefur krafa um öryggi gagna aukist. Í umfjöllun verðlaunanefndarinnar sagði að vírusvarnahugbúnaður Friðriks Skúlasonar hafi lagt þar mikið af mörkum. Friðrik hafi auk þess verið óþreytandi við að fjalla um tölvuöryggismál í ræðu og riti, svo eftir hefur verið tekið. Friðrik áttaði sig einnig snemma á möguleikum netsins og nýtti til sölu og markaðssetningar jafnvel áður en aðrir vissu um tilvist internetsins. Þá hafa önnur forrit Friðriks einnig vakið eftirtekt, þ.e. Espólín ættfræðiforritið og ekki síst ritvilluvörnin Púki.

Tölvufræðingur 20. aldarinnar
Skýrslutæknifélag Íslands útnefndi Friðrik Skúlason sem tölvufræðing 20. aldarinnar vegna mikilvægs framlags hans til tölvu- og upplýsingatækni á Íslandi.

Íslensku tölvuverðlaunin
Í febrúar 1999 var Friðrik Skúlason heiðraður sem tölvumaður ársins. Heiðurinn féll Friðriki í skaut vegna framúrskarandi árangurs og frumlegrar hönnunar á sviði hugbúnaðarþróunar. Að verðlaununum stóðu Rafiðnaðarsamband Íslands, Landsamband íslenskra rafverktaka, Íslenska álfélagið, Tölvuheimar, Rafiðnaðarskólinn og Viðskipta- og tölvuskólinn.

ENDURSÖLUAÐILAR

Friðrik Skúlason ehf. er með endursöluaðila um allt land.

Endursöluaðilar

ÆTTFRÆÐIGRUNNUR ÍSLENDINGA Á NETINU

Friðrik Skúlason og Íslensk erfðagreining hafa sameiginlega byggt upp ættfræðigrunn á undanförnum árum. Fyrirtækin ákváðu í upphafi árs 2000 að opna grunninn til almennrar notkunar á Netinu, án endurgjalds.

Ættfræðigrúsk hefur öldum saman verið ein vinsælasta tómstundaiðja Íslendinga og krefst oft töluverðra rannsókna á heimildum. Friðrik Skúlason hefur allt frá árinu 1988 unnið að því að safna ættfræðiupplýsingum og koma þeim á tölvutækt form. Síðustu árin hafa fyrirtækin tvö unnið að því sameiginlega að auka við þessi gögn og gera þau aðgengilegri fyrir notendur, þar á meðal fyrir erfðafræðirannsóknir. Fimmtán manns hafa verið að störfum við þetta verk að jafnaði frá því samstarf fyrirtækjanna hófst árið 1997.

Markmiðið með Íslendingabók er að koma öllum þeim upplýsingum, sem til eru um ættir Íslendinga, á einn stað. Grunnurinn inniheldur nú um 770.000 nöfn.

Íslendingabók nær yfir 95% ættartenginga á 20. öldinni, 98% fyrir þá nítjándu og 75% fyrir þá átjándu.

Íslendingabók er aðgengileg á Netinu á slóðinni:
http://www.islendingabok.is/

Svo má bregða á leik og prófa forritið Íslendingabók á Facebook.